ХОНГУЛ (Бухоро буғуси) йўқ бўлиб кетаётган, локал тарқалган кенжа тур ҳисобланади. Ўтмишда Сирдарё ва Амударё ҳавзаларининг барча тўқайзорларида кенг тарқалган.
Ҳозирда Амударё водийсининг юқори (Сурхондарё вилояти) ва ўрта (Бухоро вилояти Қизилқум қўриқхонаси) оқимида яшовчи, Зарафшон Миллий табиат боғи ва Қуйи Амударё биосфера резервати, шунингдек, Зарафшон дарёси юқорисида – Ўзбекистон ва Тожикистон чегарасидаги абориген популяциялари, интродукция ва реинтродукция йўли билан юзага келган сунъий гуруҳлари мавжуд.
Тожикистон, Туркманистон, Қозоғистон (реинтродукциялаштирилган), Афғонистонда ҳам учрайди. Сурхондарёда 100 дан ортиқ, Амударёнинг ўрта оқимида 120–150 та, Қорақалпоғистонда 800 та, Зарафшон дарёси водийсида 100–150 тага яқин яшайди.
Ҳозирда Зарафшон Миллий табиат боғи ва Қуйи Амударё биосфера резервати вольерларида кўпайтирилади.
